होलीको लोला

होली आयो। सके तपाईँले पनि बेलुनमा पानी भरी बाल्टिनमा टन्न थुपारी सक्नुभएको होला। फागु खेल्न रमाइलो त हुन्छ तर पानीका लोला बनाई बटुवाहरुलाई हान्ने रमाइलोमा हामीमा भने आतंक नै छाइसकेको हुन्छ। कतै बाहिर जाँदा माथिबाट बेलुनका पोका आएर आफूमाथि वषिर्ने पो हो कि भन्ने डरत्रासले समेत पनि हामी महिलाहरु अझ खासगरी किशोरवय युवतीहरु त्यो दिन बाहिर जानै आत्तिन्छन्। युवती त युवती, कतिपय
पाकी महिलाहरु समेत पनि फागुमा बेलुन हानिएर रुझ्दा निथ्रुक्क भिजेका हुन्छन्। वास्तवमा धेरैपल्ट यिनीहरुलाई लक्षित गरी हानिएको नभै तिनका अगाडि पछाडि आउँदै/जाँदै गरेका युवतीहरुलाई निशाना बनाइँदा, निशाना चुक्न गै भिजेका हुन्छन्। यसरी पानी भरिएको बेलुनले हामीलाई कौसी ,झयालबाट आक्रमण गर्नेहरुमा स-साना र स्कूले केटाकेटी मात्र हुँदैनन्, कहिलेकाहीँ त उनीहरुलाई पछाडिबाट निर्देशन दिने ठूला बडा पनि हुन्छन्।
होलीको दिन बाहिर ननिस्कनु राम्रो। तर रुझिन्छ भनेर कामै विताएर पनि त बस्न सकिन्न। बाहिर निस्किएमा पानीको ओइरो लागिने कल्पना मात्रले पनि टेन्सन हुन्छ। मानिसहरु विहानैदेखि छतछतमा बाल्टिनभरि पानी र बेलुनका पोकाहरु राखी अखाडा जमाएर बसिसकेका हुन्छन्। यस्तोबेला यिनीहरुको आँखा छलाएर फुत्कनु सक्नु पनि ठूलै चातुर्य हुन्छ। बाहिर निस्कनै पर्दा पनि पाइन्ट लगाई निस्कनु हुन्न, कुर्था सुरुवालमा अझ सके त सारी मै हिंडियो भने परिपक्व ठानेर बेलुन हान्दैनन् भन्ने साथीहरु पनि छन् तर सारीमै सजिएकी युवतीहरुलाई पनि बेलुनका लोलाहरुले खेदेर कुदाएको अनि भिजाएको पनि देखेकी छु। कुनै साथी आइडिया निकाल्छन्, होलीको दिन निस्कनै परे बरु रेनकोट वा छाता ओढी निस्कँदा कसो होला। झन सबैको तारो जस्तो कौसीबाट सोझिएका बेलुनका गोलाहरु ताकिएर सिधै आफूमाथि कसो नवर्षिएलान्।
साँच्ची भन्ने हो भने सबैभन्दा त्राहिमाम् त होलीमा यही पानी भरिएका बेलुनले बनाउँदै आएका छन्। अबिर र पिचकारी हुँदो त छ्याप्न सामुन्ने नै आउनु पर्छ तर बेलुन चैं कौसी, कोठा, चोटा जहीँकहीँबाट प्रत्यक्ष र लुकेर पनि हान्न सकिने भएकोले कतिबेला कहाँबाट त्यो बेलुनरुपी बम उडेर आउँछ, अन्दाजै गर्न सकिन्न। पानी बेलुनको सन्त्रास यति व्याप्त हुन्छ कि फागु मच्चिन थालेपछि बाहिर निस्कँदा छेउबाटै भंगेरो मात्र उडे पनि बेलुन भनी घरिघरि झस्किन्छु। सँधै बाटोमा टाँसेर हिँडिने आँखा पनि फागुका बेला सडकका झ्याल र कौसीमा हेर्दै हिंड्न बाध्य हुन्छौं ताकि बेलुनको आभाष मात्र पाउने वित्तिकै भाग्न वा बचावट गर्न सकियोस्। अझ कत्तिले त हातमा बेलुन नै नभए पनि बेलुन उज्याए सरी कौसीबाट हात उठाई उठाई तर्साएर सताउँछन्। कैयन् चोटी त यस्तो बेलुन हनाइमा धेरैको झगडै पर्छ ,अपशब्द र गाली पनि प्रयोग हुन्छन्। प्रतिवाद गर्‍यो ,उल्टो जिस्क्याई र थपडी। आफनै मुख रातो पारी जिल्लिनु पर्छ। व्यर्थै मूड खराब।
होली खेल्न नहुने भन्ने हैन तर यसरी खेलिने होलीमा अरुलाई समस्यामा मार्नु कति ठीक छ त ? जरुरी कामले बाहिर आउने जो कोहीले पनि पक्कै अनिच्छापूर्वक भिजिन चाहनु हुन्न होला। कुन मुडमा कस्तो काम लिई निस्किएको हो ,अप्रत्याशित त्यो पनि फोहर र दुर्गन्धित पानीले भिजियो भने त्यसले झगडा सिर्जना गरी दुःखद परिस्थिति पनि सजिलै ननिम्त्याउला भन्ने पनि त छैन ।
त्यति मात्र हो र ? माथि देखि स्पीडमा आउने त्यस्ता बेलुनका लोला संवेदनशील अंगहरु र शरीरमा पर्दा संकोच लाग्ने,दुख्ने त छँदैछ, कसैका लाएका चस्मा, आँखा फुट्ने मात्र नभै ठूलै चोट लाग्न सक्ने संभावनाहरुलाई समेत नकार्न सकिन्न। रमाइलो पर्व छिनमै दुखद स्थितिमा परिणत हुन के बेर ?